“We will try to recover what was taken from us and we will try to fight what is needed for my district.”
Mao kini ang mga pulong nga gipadayag ni Deputy Speaker Congressman Bambi Emano sa iyang panapos nga mensahe atol sa ika-upat nga Congressional Report (CoRe Kwatro) nga gipahigayon sa Tagoloan Dome gahapon, Enero 23, 2026.
Gibuhian ni Cong. Emano ang maong pahayag human iyang gituki ang pagpulas ug pagtibhang sa proposed budget alang sa tuig 2026, nga gikan sa ₱3.5 bilyon nahimong ₱5.5 bilyon sa Senado, apan sa katapusan ₱2.5 bilyon na lamang ang nabilin.
Samtang, kalabot sa mga isyung gilabay batok kaniya mahitungod sa giingong budget insertion, giklaro ni Emano nga ang insertion o amendment mahimo lamang nga dautan kon wala kini napatuman og insakto ug kon kini “ghost project.” Gibutyag usab niya nga wala bisan usa ka ghost project sa mga proyektong iyang gisugyot.
“Ang insertion dautan lang kung dili i-implement pag-ayo, ang insertion dautan lang kung ghost! Kalouy sa Diyos, walay bisan usa ka ghost nato nga proyekto sa ikaduhang distrito sa lalawigan sa Misamis Oriental… Dili ta mo pakauwawan!”, butyag ni Emano.
Sa wala pa niya gipadayag ang maong panapos nga pahayag, una niyang gipatin-aw nga adunay daghang mga hangyo nga proyekto gikan sa lain-laing mga ahensya sa gobyerno, barangay, ug uban pang sektor.
Bisan pa man nga nahuman na ang National Expenditure Program (NEP), gikinahanglan gihapon nga matagan og aksyon ug pondo ang maong mga proyekto sa labing madali nga panahon, hinungdan nga adunay mga amendments o insertions sa orihinal nga budget.
Sumala ni Cong. Emano, lakip sa mga inserted projects nga iyang napundohan mao ang:
– Lugait Public Market
– Manticao Public Market
– Road leading to Bolyok Water Park sa Lubilan, Naawan
– Initao Terminal
– School Building sa Ulab, Gitagum
– Solar Water System sa Laguindingan
– Solar Street Lights gikan sa Alubijid padulong Laguindingan
– Road project gikan sa Brgy. Dulong Libertad padulong Brgy. Quezon, Gitagum
– Road Drainage and Slope Protection sa El Salvador
– ug daghan pang uban.
Gikasubo usab sa Kongresista ang pagtangtang ug pagtibhang sa pondo sa upat ka dagkong proyekto, lakip ang Tagoloan Bridge, CDO–Laguindingan Mountain Diversion Road, ug Misamis Oriental West Diversion Road.
Sa pagtapos sa iyang report, iyang gipadayag ang dagkong plano sa pang-infrastruktura, soft programs, kauban ang suporta sa nagkalain-laing buhatan ug ahensya sa gobyerno.
Gipasalig ni Cong. Emano ang padayon nga pagpaningkamot ug pakigbisog alang sa kaayohan sa katawhan sa Ikaduhang Distrito sa Misamis Oriental.
Via Cheleste Simene – Jomaya (RPN DXKO CDO)