Mibisita ngadto kang Mayor Darel Dexter T. Uy ang walo (8) ka sakop sa kapolisan nga mipailawom sa Field Training Program (FTP) uban usab sa upat ka Field Training Officers (FTO) sa may alas 3:00 ang takna sa hapon, Hunyo 21 ning tuiga.
Si PSMS Edgel U. Daguipil, ang team leader, mibutyag nga ang walo ang mopa-ilawom sa upat ka bulan nga on-the-job training dinhi sa dakbayan sa Dipolog. Sulod ning mga bulana, tun-an sa nasangpit nga FTP ang tulo ka phases nga mao ang Patrol, Investigation ug Traffic.
Dugang ni PSMS Daguipil nga naabot ang nahisgutan nga mga FTP gikan sa Regional Special Training Center Unit sa dakbayan sa Zamboanga niadtong Hunyo 9, ug human gipa-ilawom sa 7-day quarantine didto sa Zamboanga del Norte Police Provincial Office (ZNPPO), gipahigayon dayon ang deployment niadtong adlaw’ng Huwebes, Hunyo 17, 2021.
Nasayran nga adunay 20 ka FTP ang kasamtangang gi-deploy dinhi sa probinsya sa Zamboanga del Norte diin unom (6) niini gidestino sa lungsod sa Sindangan, unom (6) usab sa dakbayan sa Dapitan, samtang ang walo (8) ang ania sa dakbayan sa Dipolog. (City Information Office-Ltd)Â