30.9 C
Manila
Friday, March 29, 2024

Hospital Bed Utilization Rate Sa ZamboSur Misaka Na Sa 95 Porsyento Tungod Sa Pagsaka Og Balik Sa Covid-19 Cases

- Advertisement -

Zamboanga del Sur – Gibutyag ni ZamboSur Provincial Health Officer Dr. Anatalio Cagampang Jr. nga misaka na sa 95 porsyento ang hospital bed utilization rates sa probinsya subay sa pagmonitor sa DOH-9 tungod sa pagbalik og taas sa mga kaso sa COVID-19.

Sumala ni Dr. Cagampang atol sa programang Kasayuran Express, puno na ang mga COVID wards sa Zamboanga del Sur Medical Center ug ubang pribadong hospital sa lalawigan tungod sa pagdagsa sa mga pasyenteng nataptan sa COVID-19 nga kinahanglang i-admitar ug dapatan sa hinanaling medikasyon.

Base sa talaan sa IPHO ning adlawng Huwebes, Agosto 12, misaka na sa 488 ang kinatibuk-ang COVID cases sa probinsya human madugang ang 73 ka bag-ong kaso. Sa samang petsa, mitala usab og pinakataas nga ihap sa COVID-related deaths ang lalawigan diin siyam (9) ang gikatahong nakabsan sa kinabuhi tungod sa peligrosong virus sa usa lamang ka adlaw.

Ning bag-uhay pa lamang, nabaniog sa social media ang usa ka hulagway diin makita ang mga pasyente nga naka-oxygen sulod sa ambulansya gawas sa Zamboanga del Sur Medical Center tungod kay nahutdan na og luna alang sa mga COVID patients.

Tungod sa maong talan-awon, gipadayag ni Cagampang nga padak-an pa ang temporary Ltreatment monitoring facility sa ZDSMC aron madugangan og mga luna alang sa mga moderate cases. Segun niya nga ang mga severe cases pagaatimanon gihapon sa 4th floor sa hospital.

Gawas sa pagpalapad sa bed capacity, gipahayag usab ni Cagampang nga mohimo og kaugalingong oxygen plant ang probinsya nga kayang mogama o motibol og 100 ka tangke matag adlaw aron makahatag og igong oxygen supply sa mga pasyente sa hospital.

Nasayran usab nga atol sa emergency meeting sa PIATF nga mopalit og bag-ong ultra-low freezers ang provincial government alang sa Pfizer ug Moderna vaccines ug pagdugang og mga health personnel nga mo-duty sa mga idugang nga COVID facilities. Lakip usab sa mga ipatuman ang striktong border control ug pag-improbar sa one hospital command.

Sa katapusan giawhag ni Dr. Cagampang ang pagtinabangay sa katawhan sa pakigbisog sa nagpadayong pandemya pinaagi sa pagsanong sa basic health protocols. Matud niya nga dili lamang kini kaakuhan sa mga medical frontliners ug sa gobyerno apan responsibilidad sa tanan. Gidasig usab sa IPHO head ang katawhan nga magpabakuna na aron makatampo sa gitinguhang herd immunity sa lalawigan.

(Source: ZDS Press Bureau, photo courtesy by Doki Blancia|)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -