Mipasalig si Mayor Oscar Moreno nga gihatagan sa pagtagad ang mga isyu ug reklamo nga gipadangat sa Oro Chamber of Commerce and Industry mahitungod sa pagpatuman sa Ordinance No. 14023, as amended by Ordinance No. 14066, kon ang Higala App – QR Code system.
Dugang niini, gipasabot usab ni Mayor Moreno nga dili lamang magamit ang Higala App isip contact tracing tool, apan magamit usab kini sa vaccination program sa dakbayan hilabina sa pagmugna og database alang sa tanang indibidwal nga bakunahan.
Bukas si Mayor Moreno sa ideya nga magkuha og ‘3rd party audit’ alang sa maong sistema aron masiguro nga walay anomaliya sa maong application.
Giklaro usab sa mayor nga dili angay kabalak-an ang hisgutanan sa ‘bank account hacking’ kay limitado lamang ang impormasyon nga gihatag sa matag indibidwal nga marehistro sa application, ug aduna kini security features ug compliant usab sa ‘Data Privacy Act’.
“Let’s leave this to the experts”, matod pa ni Mayor Moreno, kinsa midugang pag-ingon nga dili angay mahadlok ang mga katawhan nga magduha-duha pagparehistro tungod kay dakong tabang ang Higala App sa contact tracing efforts sa dakbayan ug magamit pa kini sa vaccination rollout.
(Sangguniang Panlungsod – CdeO)