Cebu City- Giduso sa Department of Interior and Local Government o DILG-7 ang 38 ka reklamo batok sa mga opisyal sa barangay nga gipasanginlang nalambigit sa kahiwian sa pag-apod-apod sa hinabang salapi ubos sa SAP o Social Amelioration Program ngadto sa ilang field office alang sa verification.
Una niini, gibutyag ni Director Leocadio Trovela nga nakadawat silag 47 ka complaints sa milabayng semana bahin sa mga barangay officials nga gingong nalambigit sa anomaliya.
Sa usa ka press statement, gibutyag nga ang 38 ka reklamo nga buot ipa-verify gilangkoban sa 28 sa Cebu City, lima sa Cebu province, tulo sa Bohol ug duha sa Negros Oriental.
Segun pa sa statement, nakaduso na ang DILG-7 og 12 ka verified complaints sa ulohang buhatan sa DILG diin usa gikan sa Bohol; tulo sa Cebu province; duha sa Negros Oriental; lima sa Cebu City ug usa sa Siquijor.
Giingon nga ang ulohang buhatan sa ahensiya moila kon balido ba ang reklamo unya isumitir ngadto sa Office of the Special Assistant to the President alang sa dugang aksyon.
Gikan sa nadawat nga mga reklamo, walo ang gipasa sa Criminal Investigation & Detection Group o CIDG-7 nga nasang-at na sa prosecutor’s office.
Kon mahinumdoman, gibutyag sa CIDG-7 nga nakeha na nila ang 16 ka barangay officials ug laing 27 ka tawo nga namatud-ang nalambigit sa kahiwian lakip sa pagdawat sa hinabang bisag dili kalipikado.