Dinayaw ni Gob. Matthew Marcos Manotoc ti Gulayan sa Barangay Makakalikasang Aksion Tulong sa Taong Bayan wenno GUB MATT ti Barangay Poblasion ti ili a Burgos.
Segun kenni Punong Barangay Joegie Jimenez, naragsakan ti gobernador iti pannakakitana kadagiti napipintas a natnateng nangnangruna iti pannakailawlawag kenkuana ti pakabuklan ti nasao a programa.
Imbatadna a karaman kadagiti mula a natnateng iti Gulayan sa Barangay bayat iti ibibisita ti gobernador ket kamatis, okra, sitaw, rabanos ken dadduma pay.
Impannakkel na nga iti agdama ket addan ti susueldoan ti barangay a mangmanmantener iti kanatnatenganda tapno saan a maawanan ti mula a nateng a mabalin a pagpurusan dagiti interesado a gumatang ti presko a nateng.
Malaksid iti daytoy, kunana nga adda pay dagiti napuros a natnateng a nakasagana a mailako iti Barangay Hall.
Inbunannagna a dagiti mapaglakoanda ket nairanta a mausar para iti pannakamantener ti gulayan sa barangay.
Inbunannag ni Jimenez nga inlungalong ti gobernador a nalawlawa pay ti mulaanda ti natanateng rason a ninuyunanda dagiti mulada ken adda pay ti inmulada a mais.
Innayunna a dakkel pay ti maitulong ti nasao a programa iti pannakapapigsa ti resistensia dagiti kabarangayanda. (Ronald Domingo, RPN DZRL Batac Correspondent)
(Source: LGU Burgos, Ilocos Norte)