Padayon ang pag-awhag ni Governor Steve Chiongbian Solon sa suporta sa mga katawhang Sarangan nga sundon lang ang mga gipatuman nga patakaran sa probinsya ug munisipyo ilalum sa Modified General Community Quarantine aron magpabiling luwas sa Coronavirus.
Nagtuo ang Gobernador nga gi-protektahan sa Labaw nga Makagahahum ang probinsya sa Sarangani ug ang katapad nga syudad sa Heneral Santos hinungdan nga COVID-free kini. Nangaliya usab ang opisyal nga wala nay mahimong kaso sa COVID-19 sa tibuok Rehiyon Dose. Padayon lang matud pa sa pagsalig sa Ginoo ug sa pagtuman sa mga health standard aron dili masudlan ug dili na mukuyanap pa ang makamatay nga virus.
Sa talaan sa Department of Health, anaa na sa 9,200 kapin ka mga Pinoy ang naigo sa Coronavirus, sobra 600 ang nangamatay, ug lagpas usa ka libo (1,200+) ang naka-recover.
Sama sa unang gibutyag ni Provincial Health Officer Doctor Arvin Alejandro, kadtong gitugutan nga makagawas sa panimalay ang maniguro nga una makasulod-balik sa ilang balay ang muhubo kini sa ilang mga sapatos ug gipangsuot sa lawas sa gawas sa ilang panimalay panigurado nga dili masudlan ang ilang balay sa virus. Gani, gi-rekomenda nga maligo kadtong dugay nga nibabad sa gawas. Ma-ala-ot unya ang mga kaubanang senior citizen ug kabataan sa panimalay simbako nakabitbit nag virus ang ilang myembro sa pamilya.
Segun ni Governor Solon, dili sala nga matakbuyan sa COVID-19 apan gikinahanglan matud pa nga mupabalo dayon sa lokal nga gobyerno aron matabangan, sa pagsuporta kana nila Vice Governor Elmer De Peralta, mga board member, mga mayores, ug nila Senador Manny ug Congressman Ruel Pacquiao. Kasagaran matud pa sa mga pasyente sa Coronavirus ang nagsugod sa gagmay nga sintomas maong gikinahanglan nga muadto dayon sa pinakaduol nga health center o municipal hospital.
Adunay mga COVID isolation facility giandam ang Kapitolyo sa Sarangani ug ang ka-kontrata niini nga tertiary hospital. Dul-an Usa ka Milyon ka pesos (P1M) na ang nagasto sa Provincial Government sa Sarangani maatiman lang ang mga taga-Sarangani nga una ng na-admit sa mga hospital isip mga PUI.