*Aminado si Sarangani Governor Steve Chiongbian Solon nga dili tiaw ang pag-usab sa gawi ug kalihukan sa mga tao gumikan mao na ang naandan. “Changing the behavior” matud pa ang lisod buhaton aron matuman ang minimum health standards nga ipasunod sa gobyerno gumikan sa Coronavirus pandemic.
Apan gikinahanglan matud pa kining buhaton alang sa kaayuhan sa tanan hilabi na nga gataas pa ang natakdan sa maong COVID-19. Sa dakong pag-ayuda sa kapulisan ug kasundaluhan sa pagtabang sa mga municipal ug barangay official sa pagpasabot sa kamahinungdanon sa pagtuman sa direktiba sa gobyerno ug sa pag-implementa sa mga kamanduan, hinay-hinay natun-an matud pa sa mga residente ang pagdawat sa gikaingon nga “new normal” nga pagkinabuhi.
Sa pakighinabi bag-uhay lang kang Governor Solon sa usa ka telebisyon naka-basi sa Maynila ang ANC, gibutyag sa opisyal nga nagpadayon ang information campaign sa AFP ug PNP Sarangani bisan sa mga kabukiran aron hinay-hinay mapasabot sa mga lumulupyo ang ka-importante sa pag-obserba sa health protocols. Anaa naka-ayuda sa kanunay ang pamunuan ni PNP Sarangani Provincial Director Col. Lex Ephraim Gurat sa ilang “Oplan Yawyaw-Oplan Sita,” ug si 1002nd Brigade Philippine Army Commander Brigadier General Adonis Bajao, kuyog ang pito (7) ka municipal chief of police ug ang 73rd IB ug 27th IB.
Segun ni Governor Solon sa iyang pagtuyok sa mga barangay kapitan, walay laing pang-depensa ug opensiba magamit sa katawhan tungod sa kawad-on sa bakuna ug mass testing entiro Pilipinas, ug kana mao matud pa ang paggamit og face mask, physical distancing duha (2) ka metros, hand sanitizing ug ang paglikay sa panagtapok sa tao.
Gihimo niining halimbawa ang nasud Taiwan. Silingan ang China ug Taiwan apan ning tungura, 440 kabuok ra ang natakbuyan sa COVID-19 sa Taiwan, pito (7) lang ang namatay. Ikumpara sa ubang mga nasud, sama sa Amerika nga pinakadaghan ang nabiktima kung diin 1.4 Milyon kabuok na karon nga mga Amerikano ang nataptan sa maong makalilisang nga virus, dul-an 90,000 kanila ang nangamatay. Sa Pilipinas, hapit 12,600 kabuok ang naigo, sobra otso sientos (800>) ang nangamatay.
Gani, nakugang napud kagabii tungod sa bag-ong datus gikan sa Department of Health. Human sa mga semana nga walay natalang kaso sa Coronavirus sa Region 12, adunay tulo (3) ka mga indibidwal ang nag-positibo kagahapon. Usa taga-Cotabato City, usa taga-North Cotabato, ug ang ikatulo taga-Polomolok, South Cotabato. Anaa na matud pa sila sa stable nga kondisyon.
Ang sekreto sa mga Taiwanese bisan wala kini nagpatuman og lockdown gikan sa pagsugod mao ang hugot ug seryoso nga paggamit og face mask ug pag-obserba sa physical distancing, wala sila nagkumpyansa gawas sa ilang gibuhat nga mass testing ug ang pagbawal sa mga byahe sa eroplano gikan sa Wuhan, China.
“Maximum tolerance” ang direktiba, apan kadtong dili na gyud patuo sa mga pahimangno, walay mahimo ang mga kapulisan kundili sa pagdakop niini. Gidasig ni Col. Gurat ang mga barangay kapitan sa pagsita sa mga dili patuo gumikan kasupakan matud pa sa Article 151 sa Revised Penal Code ang ilang gibuhat, “resistance and disobedience to persons in authority and their agents.”
Ang mga barangay kapitan ang apil sa persons in authority, samtang ang mga barangay kagawad ug barangay tanod ang apil sa agents of the persons in authority ug mga law enforcement agent. Kini nga mga lakang ang suportado usab nila Vice Governor Elmer De Peralta, tanang board member, mga mayores ug nila Senador Manny ug Congressman Ruel Pacquiao.