Cebu City- Gipasalamatan ni Cebu Provincial Governor Gwendolyn Garcia si DENR Secretary Roy Cimatu sa iyang pagmando niadtong Biyernes, September 25, 2020 alang sa pagpahunong sa operasyon sa dolomite mining ug mineral processing firms sa Lungsod sa Alcoy Lalawigan sa Sugbo samtang gipaabot pa ang resulta sa imbestigasyon labot sa gi ingong kalapasan sa duha ka kompaniya.
Gireklamo sa kagamhanan sa Probinsya sa Sugbo ang ilahang mining permits, water discharge ug Environmental Compliance Certificate (ECC).
Gipadayag ni Garcia ang ilahang laraw sa pagluwat ug Cease ug Desist Order apan mapasalamaton kini gumikan sa dinaliang gihimo ni Secretary Cimatu.
Nagtoo ang Gobernador nga nasayod na ang kalihim labot sa gipahigayong imbestigasyon sa lokal nga kagamhanan sa Lalawigan sa Sugbo ug ang mga report nga niabot gikan sa lainlaing ahensya sa goberno .
Kini naglakip gikan sa Environmental Management Bureau (EMB), Mines and Geosciences Bureau (MGB), Provincial Environmental and Natural Resources Office (PENRO) nga maoy mipahigayon sa site inspection.
Base sa report,matod ni Garcia dunay nakitang tataw nga kalapasan sa ECC ug sa water discharge permit nga maka mugna ug pagka daut sa seabed.
Si Cimatu mipahunong sa operasyon sa Dolomite Mining Corporation (DMC ) ug sa Philippine Mining Service Corporation (PMSC) nga nag process ug dolomite.
Ang dolomite gi export isip raw material ngadto sa mga nasud sa Korea ug Japan alang sa pagpang himo ug glass ug steel.
Karong bag-o gigamit kini isip hulip sa bas ug graba alang sa rehabilitation project sa Manila Bay.
(Jhon Tadlip/ photo courtesy of Cebu Provincial Government)
(Source: Cebu Provincial Government)