Nagapela ni Ilocos Norte Gov. Matthew Marcos Manotoc a makissayan pay laeng iti bilang dagiti aplikante a mangala ti passport na iti DFA Ilocos.
Gagem daytoy ti gobernador ket tapno masigurado nga awan iti taga NCR plus wenno manipud iti Metro Manila, Cavite, Bulacan, Rizal ken Laguna ti makastrek pay laeng iti DFA Ilocos a mangala iti aniaman a serbisio.
Impasingked ti gobernador nga amin a sumrek iti DFA iti San Nicolas ket masapul nga adda ti maipakita da a negative result iti RT-PCR test.
Maipalagip a 15 a tattao ti naduktalan iti boarder a nagpositibo iti virus a dagitoy ket agturong da koma iti DFA San Nicolas.
Gapu iti daytoy, kuna na a masapul a dagiti mapan iti DFA ket adda ti RT-PCR test da ken saan da nga aggapu iti NCR plus wenno kadagiti nadakamat a lugar.
Nupay kasta, inlawlawag ti gobernador a maipalubos dagiti non-residents ti Ilocos Norte wenno saan a taga Ilocos Norte la ketdi saanda nga aggapu iti NCR nga umay agpapasport ngem masapul nga adda iti negative RT-PCR test dagitoy. (Rosita Macalipis, RPN DZRL Batac Correspondent)
(Source: Provincial Government of Ilocos Norte)