Matuman na ang gidamgo sa mga lumulupyo sa Barangay Potungan sa Dapitan City nga makabaton og permanenteng suplay sa tubig sa ilang matag panimalay.
Kini pinaagi sa balor ₱ 9.5 million nga Level III Water System Project (house to house connection) sa kagamhanang probinsyal ubos sa administrasyon ni Governor Roberto Uy nga gitukod karun didto sa Purok 5 sa maong barangay.
Si Barangay Chairman Dick Dancalan ang mapasalamaton sa kahitas-an sa grasya nga tubig nga mitubod gikan sa maong proyekto.
Gipadayag sab sa kapitan ang iyang dakong pagpasalamat ngadto ni Gov. Uy sa pagpahat sa maong proyekto alang sa Brgy. Potungan.
Sumala niya nga makabenepisyo niini ang kapin kon kulang 480 ka bubong sa tibuok barangay ilabina ang mga taga Purok 5 diin pinakaproblema ang tubig sanglit anaa kini sa hataas nga lugar ug layo pa ang kab-anan.
Lakip pod nga gipasalamatan sa kapitan ang pamilya Page kinsa maoy midonar sa luna nga gitukuran sa proyekto.
Matod ni Mr. Giovanni Page, ang midonar sa 200 sq. meters nga yuta kinsa usa usab ka lumad nga Dapitanon, nga wala magduhaduha ang ilang pamilya sa paghatag niini sanglit buot pod nila nga matabangan ang mga kaigsoonang Dapitanon sa Potungan.
Dugang gipaambit ni Mr. Page nga aduna pod siyay kapin usa ka ektarya nga luna haduol sa gitukuran sa maong proyekto nga libre sab niyang gipagamit sa mga mag-uuma sa eGBU.
Samtang, nagpasalamat si Vice Mayor Jimboy Chan sa labaw’ng makagagahum nga gihimo niining instrumento si Gov. Uy aron matuman ang dugay nang gidamgo nga proyekto nga labing gikinahanglan sa tanang katawhan sa Potungan.
Gibanabana nga mubuswak og kapin dos litros nga tubig matag segundo ang tubod nga natumbok sa PEO-waterworks team gikan sa gilawmon nga 190 feet.
Lakip sab sa maong proyekto ang pagtukod sa elevated reservoir nga may 31,000 Liters nga kapasidad, ang pagtukod sa chlorinator house ug perimeter fence, ingon man ang pagbutang og mga tubo sa tubig konektar ngadto sa mga kabalayan.
(Source: Provincial Information Center-Zamboanga del Norte Facebook page)