Gisiguro karon sa Gensan nga walay ma apektohan sa sakit sa mga baboy nga African swine Fever. Kini ang giluwatang pamahayag gikan sa buhatan sa Department of Agriculture kalabot sa gikuyawang balatian sa mga baboy. Kahibaluan nga sa Rizal Province unang nahimong problema ang maong balatian sa baboy diin naka apekto sa dakong industriya sa maong probinsya.
Sumala pa ni Dr. Antonio Marin, labaw sa City Veterinary Office nga gisiguro gayud sa ilang buhatan ang pag amping batok sa maong sakit sa mga baboy tungod kay ang GenSan ang maoy gapagawas og baboy ngadto sa ubang dapit isip third largest hog producer sa Pilipinas.
Apan gihingosgan ni Marin, bisan pa niini istrikto gihapon nilang gipatuman ang movement sa baboy ingon man ang pagpatuman sa food safety ug pag-monitor sa mga backyard piggery aron maaksyunan gilayun ugaling may mga mahitabong kamatay sa mga baboy.
Kahibaluan nga wala pay opisyal nga resulta ang gipadala nga sample didto sa Australia tungod sa kamatay sa mga baboy sa Rizal province nga unang gikabalak-an nga African Swine Fever.
Ang industriya sa baboy matud pa sa Pilipinas nagkantidad og P268 billion mao nga ginahimo sa gobyerno partikular sa Department of Agriculture ang tanang pamaagi aron dili kini maapektuhan.