General Santos: Turn-over ceremony sa “Bag-ong Super Health Clinic” sa Alabe, gitambongan ni Senador Bong Go

0
11
photo courtesy by R. Agdon & Sen. Bong Go Facebook page
Alabel, Sarangani Province – Personal nga gitambongan ni Senador Kuya Bong Go ang inagurasyon sa Super Health Center nga nahimutang sa Brgy. Alegria, Alabel, Sarangani Province kagahapong adlawa, Biyernes, Hunyo 28, 2024.
Kaabag ni Senador Go sa opisyal nga ribbon cutting ug turn-over ceremony sa maong proyekto sila Alabel Municipal Mayor Vic Paul Salarda ug ang asawa niining Municipal Administrator nga si Ybing Salarda, ingon man sila Sarangani Provincial Administrator Atty. Ryan Ramos, ang Chief-of-Staff ni Sarangano lone District Representative, Congressman Steve Chiongbian Solon nga si Engr. Gerald Faciol, ilabi na ang labaw sa Department of Health (DOH) Region 12 Director Dr. Arestides Tan ug uban pang mga opisyal sa probinsiya.
Kung mahbinumdoman, gisugdan pag-ground breaking ang maong proyekto niadtong Abril 27, 2023, nga susamang gitambongan ni Senador Go kauban si Alabel Municipal Mayor Vic Paul Salarda, mga sakop sa 14th Sangguniang Bayan sa Alabel, ug mga kadagko-an sa Department of Health (DOH) – Region 12.
Ang pagtukod sa mga Super Health Centers bisan sa hilit nga mga komunidad sa atong nasud kabahin sa inisyatiba ni Senador Kuya Bong Go isip Chair sa Senate Committee on Health aron mapaduol ang dekalidad nga serbisyong medikal sa gobyerno ngadto sa katawhan—ilabina sa mga kabus.
Nagpasalamat ang senador sa tabang ug suporta nila ni Kongresista Steve Chiongbian Solon, Gobernador Rogelio Pacquiao, Mayor Vic Paul Molina Salarda, Bise Mayor Lente Salway Jr., ug ubang lokal nga mga opisyal nga kauban niya sa importante kaayong seremonyas.
Ang Super Health Centers usa ka gipaayo nga bersyon sa mga rural health centers, nga gisangkapan sa pagdumala sa database, outpatient, birthing, isolation, diagnostic; kagamitan sa laboratoryo, X-Ray ug ultrasound; botika, ug ambulatory surgical unit.
Ang mga serbisyo nga gihatag sa Super Health Center naglakip sa database management, outpatient, birthing, isolation, laboratory, x-ray ug ultrasound, pharmacy, ug ambulatory surgical unit.
Aduna usab kini mga serbisyo sa mata, dalunggan, ilong, ug tutunlan, oncology centers, physical therapy ug rehabilitation centers, ug telemedicine diin ang mga pasyente makapakonsulta sa Doktor sa Super Health Centers, bisan anaa ra ang magpakonsultang pasyente sa ilang kaugalingong panimalay.
Ang kahimsog sa matag-Pilipino importante kaayo kang Senador Kuya Bong Go, mao nga padayon siya nga nagkugi aron makatabang sa pagpalambo ug pagpamuhunan sa atong healthcare system. (Rem C. Agdon)

Leave a Reply