General Santos City: Malampusong gilusad sa Sarangani Province ang labing unang higayon sa MORO GENERAL ASSEMBLY sa maong probinsiya pinaagi sa Sarangani United Bangsamoro Justice Party nga gitambongan sa kapin kon kulang sa 2,000 ka mga Moro people. Gilusad kini ning nakalabay’ng adlaw, Pebero 18, 2025 sa Provincial Capitol Gymnasium, Alabel, Sarangani Province. Kini nakaangkla sa tema nga: “Ang Panaghiusa Nagpasiugda sa Malungtarong Kalinaw ug Malungtarong Kauswagan,” diin nagpakita kini sa usa ka pasalig sa kalinaw ug pag-uswag. Gipasiugda ni Gobernador Rogelio Pacquiao ang tumong sa asembliya sa pagpakusog sa kampanya batok sa ilegal nga droga, nga gitawag kini nga “usa ka salot nga makaguba sa kinabuhi, makaguba sa mga pamilya, ug makapahuyang sa moral nga pundasyon sa atong mga komunidad.” Gipahigayon usab kini aron adbokasiya batok sa ilegal nga drugas sa probinsiya. Gihatagan og gibug-aton ni Gov. Pacquiao ang kahinungdanon sa padayon nga kolaborasyon, gipasiugda ang mga programa sa paghatag gahum sa komunidad nga nakapunting sa “pagpugong, rehabilitasyon, ug reintegrasyon” aron suportahan ang mga biktima ug mga paningkamot sa pagbawi. Siya miingon nga pinaagi sa Ronda Probinsya Kalinaw ug RP Sarangani Moro Affairs Program, ang Provincial Local Government Unit aktibong nagsuporta sa mga inisyatibo nga nagpasiugda sa peacebuilding, cultural preservation, ug socio-economic development sulod sa mga komunidad sa Moro sa Sarangani. Ang Sarangani United Bangsamoro Justice Party Provincial Executive Officer DM Tommy J. Nawa miingon nga ang asembliya nangayo usab sa suporta sa mga lider sa probinsiya alang sa pagmugna sa mga ordinansa nga nag-institutionalize sa mga programa sama sa Madaris ug pagsiguro sa representasyon gikan sa Bangsamoro sa legislative body. Lakip nga mitambong sa maong katigoman si Sarangani lone District Congressman, Steve Chiongbian Solon ug uban pang mga opisyal sa Probinsiya.