General Santos City – Anaa sa 50 ka mga tulunghaan sa GenSan ang naghatag na ug lugar sa ilahang mga campus aron nga makamugna ug school base vaccination para sa mga magtutungha batok covid-19.
Sumala pa ni Deped Gensan School Division Superintendent Rommelito Flores nga ang City Health office ang maoy manguna sa maong plano ug sila man usab ang magbakuna sa mga bata samtang ang DEPED ang maghatag lang ug lugar aron nga mas accessible kini ngadto kanila.
Kini matud pa ang nakita nila nga pamaagi aron nga ma-awhag ang mga ginikanan nga pabakunahan ang ilahang mga anak alang usab sa dugang proteksyon batok covid-19.
Nasayran nga ubos ang ihap sa mga nabakunahan sa edad 5-11 age group kung asa sa 91,716 nga papulasyon sa elementary learner sa Gensan anaa palang sa 2,040 ang bakunado batok covid-19 kun 2.22% ug ang 86,676 ang nagpabiling unvaccinated.
Gi-angkon ni SDS Flores nga usa gayud sa rason nganong ubos ang vaccination rollout sa maong age group mao ang kahadlok sa mga ginikanan sa mamahimong epekto ngadto sa ilang mga anak tungod sa sayop nga impormasyon nga nagakatag sa social media.
Ang kinahanglan lang matud pa niini mao ang parents’ consent nga pabakunahan nila ang ilahang mga anak apan ang buot mahitabo ni SDS Flores nga anaa gayud ang ginikanan sa pagbakuna sa ilahang mga anak.
Samtang wala pa usab niini nasayran kung kanus-a masugdan ang maong plano sa CHO. (Alfredo Madas Jr.)