Tantangan, South Cotabato—Nagpadayon ang Animal Disease Surveillance Team sa Provincial Veterinary Office-South Cotabato sa pagpahigayon ug blood collection ug swab testing ngadto sa mga fowls ug poultry nga duol sa Barangay Magon, Tantangan, South Cotabato kansa nakatala ug kaso sa bird flu.
Sumala ni Dr. Errol Javier, Provincial Veterinary Officer nga tumong sa pagpahigayon niini aron nga masayran kung aduna bay mga sentomas sa bird flu ang mga binuhing manok o pato ug uban pa sa lugar.
Gihingusgan ni Dr. Javier nga ang bird flu pelegroso tungod dili lang kini makatakod sa manok sanglit makatakod usab kini sa tawo mao nga dapat lang kining masanta.
Dugang pagbutyag ni Dr. Javier nga dako ang ilang pagpasalamat ngadto sa mga residente nga nagtugot sa ilang team nga pagpahigayon ug blood collection ug swab sa ilang mga binuhing manok, pato ug uban pa.
Dako matud pa kining tabang aron nga mapugngan ang pagkatag sa maong sakit.
Nasayran nga mukabat sa 34 ka mga barangay ang target sa Pvet nga pahigayunan ug blood sampling ug swab testing sa mga fowls ug poultry.
Kahinumduman nga sa nakalabayng semana, mukabat sa 81,000 ka mga manok ang naapil sa depopulation sa Tantangan human nga nakatala ug kaso sa bird flu sa usa ka poultry sa maong barangay.
Source: South Cotabato Provincial Government fb page