Proteksyon ngadto sa mga pasahero ang tumong sa gipagawas nga fare matrix sa lokal nga panggamhanan sa dakbayan. Kini ang giklaro ni GenSan City Councilor Dominador Lagare Jr., chairman sa komitiba sa transportasyon sa konseho.
Saysay niini nga gumikan sa kadaghan ug reklamo gumikan sa mahal nga singil sa pamasahe, nagpagawas ug fare matrix ang syudad aron mabatukan ang sobra kamahal nga singil sa mga tricycle ug uban pang matang sa transaportasyon sa GenSan.
Awhag niini ngadto sa mga pasahero nga mabiktima gihapon sa over-price nga pamasahe sa GenSan luyo pa man sa gipagawas nga fare matrix, mamahimong magreklamo o magsumbong sa public safety office.
Gikupirma usab ni Councilor Dominador Lagare Jr. nga sa karon naka-status quo pa ang pagrelease sa franchise sa mga tricycle sa syudad.
Pasabot nga walay i-renew nga mga franchise sa tanang mga tricycle nga mag-expire na o mag-epire pa lang hangtud sa bulan sa Nobyembre.
Plano nila nga ihatag ngadto sa mga kooperatiba sa tricycle ang maong mga franchise aron nga ma-regulate ang byahe sa mga tricycle sa syudad.
Panawagan niini ngadto sa mga tricycle nga nag-expire na ang prangkisa, padayon lang sa pagbyahe apan kinahanglan nga musubay gihapon sa balaud.
Kalabot niini, gibutyag ni Kagawad Lagare nga nahatagan na ug direktiba ang mga city enforcers nga dili manakop ug mga tricycle nga nag-expire ang prangkisa.
Apan, giklaro niini nga dili nila kontrolado ang operasyon sa kapulisan gumikan aduna usab unit nga nagapanakop sa mga kolurom ug expire nga mga prangkisa. Busa pasensyahan nalang matud pa higayon nga madakpan sa kapulisan. (John Rey Somido)