koronadal City – Subay sa padayong kampanya batok sa pagkuyanap sa ilegal nga drugas sa SOCCSKSARGEN niresulta sa pagkasikop sa tulo ka High-Value-Individuals ug pagkasakmit sa kapin P2,400,400.00 nga kantidad sa gituohang shabu atol sa buy-bust operation sa Purok Twin River West, Barangay Sto. Niño, Koronadal City, niadtong Abril 23, 2025.
Ang operasyon gihimo sa hiniusang operatiba sa Koronadal City Police Station, Provincial Drug Enforcement Unit (PDEU) sa South Cotabato Police Provincial Office, Regional Intelligence Division 12 nga misangpot sa pagkasikop ni alyas “Taloy”, 39 anyos, residente sa Barangay New Lambunao, Koronadal City; alyas “Lando”, 32 anyos, residente sa Barangay Saravia, Koronadal City; ug alyas “Nono”, 42 anyos, ug residente sa Barangay Topland, Koronadal City, pulos gi-tag nga HVI’s.
Narekober atol sa operasyon ang walo ka sachet sa gituohang shabu, nga motimbang og 353 gramos, nga adunay National Standard Drug Price (NSDP) nga P 2,400,400.00. Nasakmit usab ang usa ka homemade 12-gauge break-open pistol ug ang ₱500.00 nga buy-bust money.
Gidala sa Koronadal CPS ang mga dinakpan nga mga suspek ug mga nakumpiska nga butang alang sa tukmang dokumentasyon ug disposisyon.
“Ang pagkasakmit sa kapin sa Php2.4 milyones nga balor sa ilegal nga drugas ug ang pagkasikop sa tulo ka high-value nga mga indibidwal klarong mensahe sa mga drug personalities sa rehiyon, ang PRO 12 walay hunong sa kampanya batok sa ilegal nga drugas.” Ang pamahayag ni PRO-12 Regional Director PBGen. Arnold Ardiente. (Rem Agdon)
News&Graphics: RPIO-PRO12