General Santos City – Nadiskubrehan sa hini-usang pwersa sa kapulisan, PDEA ug militar kagahapon sa buntag, Agosto 4, 2024 (Domingo) sa hilit nga bahin sa SITIO SAGEL, BRGY. PINOL, MAITUM, SARANGANI PROVINCE ang gituohang mga makinarya ug uban pang mga ekwipo sa paggama og shabu sulod sa usa ka bodega nga posebling himoong shabu laboratory, apan wala pa kini ka-operate gumikan wala pa’y linya sa kuryenti.
Sa report sa Sarangani PNP, mga alas 8:30 sa buntag gironda sa mga awtoridad nga gipangulohan ni PCOL Deanry R. Francisco, Provincial Director sa Sarangani Police Provincial Office (SPPO) uban sa mga personnel. sa Maitum MPS, PIU, PDEU, PDEG, 2nd PMFC, 38th IB PA ug PDEA 12 ang nasangpit nga bodega sa nasampit nga dapit pinaagi sa Search Warrant No. 16-2024 nga gi-isyu sa RTC Branch 50, Sarangani Province. Ang maong bodega nahimutang hadu-ol ra sa kampo MNLF- Moro national Liceration Front, apan una nang gipa-klaro ni Sarangani PNP Provincial Director DEANRY FRANCISCO sa usa ka Press Conference sulod sa munisipyo sa Maitum nga walay kalambigitan ang MNLF sa mga nakompiska nilang SHABUNMANUFACTURING MACHINERIES.
Gani, ang mga komunidad pa sa MNLF sa lugar ang gatimbri ngadto sa mga awtoridad sa mga aktibidad sa naasoy gironda nga bodega human namatikdan nga daw dili maayo nga mga butang ang anaa sa sulod niini nga gipatu-o niadtong una sa mga residente sa maong lugar nga usa ka LIVELIHOOD PROJECT.
Gikabutyag pa sa taho sa Sarangani PNP ngadto sa Police Regional Office (PRO) 12 nga usa ka Chinese national nga gitago lamang sa alyas TOM nga kasamtangang nagpuyo sa General Santos City, ang giingong nakit-an nga nibisita sa nasangpit nga bodega. Sa pagkakaron, padayon ang hugot nga imbestigasyon sa mga awtoridad aron masikop ug makasaohan ang tanang nalambigit sa naasoy’ng drug-related activities. (Rem C. Agdon)