General Santos City: Nasikop ang usa ka high value individual (HVI) human nasakmit ang kapin sa P600,000 pesos nga kantidad sa gituohang shabu sa Purok Banisil, Brgy Tambler, General Santos City. Sa report sa Regional Police Drug Enforcement Unit (RPDEU) 12, ang suspek nga si alyas “Zaida” (HVI), 48-anyos nga residente sa Brgy. Poblacion, Tacurong City, sa buy-bust operation nga gipahigayon sa RPDEU 12 (lead unit), PNP Drug Enforcement Group-Special Operations Unit 12, Regional Intelligence Division 12, City Police Drug Enforcement Unit, ug General Santos City Police Office-Police Station 5. Dugang pa, nadakpan ang suspek human namaligya og usa ka plastic sachet sa buy bust money nga gipalitan sa polis nga poseur buyer sa shabu. Nasakmit gikan sa suspek ang gibana-banang 100.96 gramos sa gituohang shabu nga adunay standard nga presyo sa drugas nga P686,800. Ang dinakpan nag-atubang og kasong kalapasan sa Republic Act 9165 o Comprehensive Dangerous Drugs Act of 2002.