General Santos City – Ang Lalawigan sa Sarangani nakahimo ug mahinungdanong lakang ngadto sa pagpausbaw sa iyang imprastraktura sa turismo pinaagi sa groundbreaking ceremony sa P4 milyong balor sa Sarangani Provincial Tourism Center nga gilusad kagahapong adlawa, Hulyo 11, 2024 sa Capitol Compound.
Ang nag-unang katuyoan sa pagtukod sa Provincial Tourism Center mao ang pag-establisar ug one-stop shop information center alang sa lokal ug langyaw nga mga turista aron mapalambo ang kasinatian sa turista, mapalambo ang malungtarong mga pamaagi sa pagbiyahe ug mapausbaw ang mga kalihokan sa ekonomiya sa probinsiya.
Ang sentro usab nagtumong sa paghatag ug usa ka daklit nga pagtan-aw sa nagkalain-laing turismo ug mga halad sa produkto sa Sarangani nga naglakip sa kultural nga kabilin sa Probinsya. Ang Provincial Tourism Center maoy garbo sa matag Sarangan sa pag-abiabi sa mga bisita sa Sarangani, ang Yuta sa Katahom.
Busa, si Gobernador Rogelio Pacquiao, naghatag ug gibug-aton sa kritikal nga papel sa turismo sa pagduso sa lokal nga ekonomiya ug miingon nga “ang turismo mao ang usa sa mga nag-unang drayber sa atong ekonomiya.”
Pinaagi sa pagtukod sa Sarangani Provincial Tourism Center, si Gobernador Pacquiao naglaum nga mapahapsay ang kasinatian sa turista, makapalambo sa mas organisado ug makalingaw nga pagbisita samtang nagpasiugda sa malungtarong kalamboan sa ekonomiya sulod sa probinsiya.
Sumala sa statistical data gikan sa Sarangani Tourism Investment and Promotion Center, gikan sa 2014 ngadto sa 2022, ang tourist arrivals sa Sarangani misaka gikan sa 1,207,985 ngadto sa 2,826,302, nga nagpasiugda sa panginahanglan sa usa ka komprehensibong sentro sa impormasyon sa turismo aron sa pag-atiman sa nagkadaghang mga bisita.
Ang pagtukod sa usa ka andana nga tourism building, nga gipundohan sa P4 milyones nga Seal of Good Local Governance (SGLG) Incentive Fund, nagtimaan sa mahinungdanong higayon sa pasalig sa probinsiya sa malungtarong turismo ug pagtubo sa ekonomiya.
Ang pondo gihatag ngadto sa Sarangani isip usa sa mga nakadawat sa 2023 Seal of the SGLG, nga nagpakita sa dedikasyon sa probinsiya ngadto sa excellence sa local governance.
Tungod niini, gidayeg gayud ni Department of Tourism XII Regional Director Nelia Arina si Gobernador Pacquiao, Provincial Tourism Council sa Sarangani, Inc. President Jobelle Pacquiao, ug ang tanang opisyal sa probinsiya sa ilang liderato ug paghatag ug highlight sa industriya sa turismo sa Sarangani. (Rem C. Agdon)