Plano ni General Santos City Mayor Lorelie Pacquiao nga patas-an ang pinakataas nga kantidad sa financial assistance nga gihatag sa dakbayan ubos sa “AMPING” program o Auxiliaries and Medical Program for Individuals and Needy Generals.
Sa paghinabi kang Pacquiao niingon nga gihangyo niya sa Sangguniang Panlungsod nga patas-an ang taripa o kantidad sa financial assistance nga mahatag sa siyudad ngadto sa mga benepisyaryo.
“Naa gyuy taripa sa ordinansa pero usahay naa tay konsiderasyon kay dako man gyud ang bayronon, mahal kaayo. Atoa nang ge-request sa SP nga patas-an ang taripa para ma patas-an pa nato ang paghatag og hinabang,” sumala pa. kay Pacquiao.
Sa pagkakaron, ang pinakataas nga kantidad nga mahatag sa AMPING kay P10,000 lang ug depende sa kaso sa usa ka indigent resident.
Samtang, sugod karong Sabado, Mayo 6, abli ang buhatan sa AMPING bisan weekend, 8:00am hangtud 5:00pm. (Fred Degala)
