General Santos City – Dakong tabang ang duha ka jail facility nga unang gi-inagurahan ni DILG Secretary Benhur Abalos sa iyahang pagbisita sa dakbayan milabay’ng bulan aron mabawasan ang kaguot sa male dormitory sa General Santos City Jail.
Sumala kang Jail Superintendent Riuven Olivo, Jail Warden sa male domitory nga anaa sa kapin 1300 ang mga piniriso ug higayon nga magamit na ang duha ka pasilidad, anaa sa 70% ang mabawas sa congestion rate sa male dormitory.
Pag-angkon niya nga wala pa nabalhin ang uban mga piniriso sa bag-ong pasilidad gumikan ilaha pang ginahulat ang resulta sa gihimong sa inspection team sa BJMP sa maong mga pasilidad.
Samtang gi-angkon ni Jail Superintendent Olivo nga ubay-ubay ang mga high risk ang anaa sa ilahang pasilidad nga dili muubos sa 80. Pagmahayag niini nga sa tibuok rehiyon 12, ang jail facility sa GenSan ang gikonsiderang luwas nga pasilidad para sa mga high risk inmates.
Sagad matud pa sa mga high risk inmate ang adunay kasong multiple murder, mga nakuhaan ug armas, samtang uban ang gikonsiderang miyembro sa mga teroristang grupo. (Alfredo Madas Jr.)