Sarangani Province – Gikalipay karon sa mga taga-Sarangani Province ang pagka-aproba sa Malakanyang sa Republic Act No. 12142 pagdeklara nga permanente na nga non-working holiday ang matag Nobyembre 28 nga selebrasyon sa foundation anniversary ug MunaTo Festival sa probinsya.
Duha (2) ka petsa ang makasaysayanon sa mga katawhang Sarangan tungod kasumaran kini sa pagkamugna sa ilang pinalangga nga Sarangani Province human nasiak sa lalawigan sa South Cotabato, rason nga duha ang ilang provincial festival.
Dungan sa pagsaulog sa founding anniversary ug MunaTo Festival matag Nobyembre 28 mao ang pagdumdom sa kasumaran sa petsa nga unang naka-angkon og corporate powers isip usa ka local government unit ang Provincial Government sa Sarangani November 28, 1992, human nakalingkod ang unang mga opisyales gipangunahan kaniadto sa mga apuhan ni Congressman Steve Chiongbian Solon nga sila the late Congressman James Chiongbian ug the late Governor Prescilla Chiongbian.
Samtang, matag bulan sa Mayo atol sa sikat nga beach party sa nasud, ang Sarangani Bay Festival, paghinumdom usab kini sa kalampusan sa natigayon nga plebisito May 19, 1992 pabor sa pagbulag sa Sarangani sa South Cotabato alayon sa gipasa ni Congressman James Chiongbian, ang Republic Act No. 7228, balaod nga nagmugna sa probinsya sa Sarangani. (Rem Agdon)
News&Graphic: EdBelacura