Sarangani Province – Boluntaryong mitahan sa kaugalingon ang usa ka miyembro sa Communist Terrorist Group sa Kapulisan sa lungsod sa Kiamba, probinsya sa Sarangani niadtong nakalabay’ng Hunyo 3, 2023.
Gibutyag ni Police Brigadier General Jimili L Macaraeg, Regional Director sa Police Regional Office 12, ang boluntaryong misurender nga si alyas “Albert”, 33-anyos, kanhing miyembro sa Guerilla Front 73 MUSA Far South Mindanao Region (FSMR) ug residente sa Brgy. Gasi, Kiamba, Sarangani Province.
Alas 10:30 sa buntag boluntaryong mitahan si alyas “Albert” sa mga sakop sa Sarangani PNP, Kiamba PNP diin bitbit niini ang usa ka unit sa Springfield Garand Rifle nga may duha ka buhing bala.
Gipresentar usab ang nasampit ngadto kang Mayor George F Falgui, diin gilayon kining gihatagan ug paunang tabang panginabuhian.
Gidayeg usab ni PBGen Macaraeg, ang Sarangani PNP sa pagpaningkamot alang sa hapsay nga pagtahan sa kaugalingon sa CTG member ingon man sa lokal nga panggamhanan sa Sarangani ug sa pagdawat niini kang alyas Albert aron nga makapanginabuhi kining normal uban sa kumunidad.
Samtang gipaniguro usab sa PNP nga padayon nga makadawat ug tabang ang maong mga kanhing CTG member gikan sa gobyerno pinaagi ilawom sa programang Enhanced Comprehensive Local Integration Program o E-Clip. (Rey G. Ombaña)
(Source: SOCCKSARGEN PCADG)