General Santos City – Wala na makalingkwas pa sa baba sa kamatayon ang usa ka Mark Andre Galgoles, 22 anyos, residente sa Purok Acharon, Brgy. Labangal ning dakbayan sa GenSan human kining gipusil sa wala pa mailhing suspek pasado alas12:00 sa kadlawon niadtong nakalabayng adlaw sa area sa National Highway, sakop sa Purok San Roque, Barangay Labangal ning dakbayan.
Subay sa imbestigasyon sa kapulisan, nagbaktas ang biktima uban ang iyahang mga higala gikan sa Makar Wharf padulong sa ilahang panimalay sa Purok Mauswagon, Brgy. Labangal, apan pag-abot sa lugar, aduna matud pay mga tambay sa dalan kung asa gibato ang mga nasangpit. Usa sa mga suspek ang nipabuto ug pusil gamit ang usa ka improvised pistol kon sumpak.
Naka-angkon ug igo pinusilan sa likod nga bahin ang biktimang si Galgoles nga hinungdan sa iyahang hinanaling kamatayon.
Sa pagsuta sa lugar sa krimen, narekober sa awtoridad ang usa ka basyo sa kalibre 45 nga pistola.
Sa kasamtangam aduna nay person of interest ang kapulisan sa maong insidente ug ginasuta ang motibong personal interest o dili ba kaha na-tripan lang ang mga nahisgutan.
Samtang hustisya usab ang panawagan sa inahan sa biktima nga si Marrisa Apilado human gipusil-patay ang iyahang anak.
Sumala niini nga wala nananghid ang iyahang anak nga mulakaw niadtong higayuna ug wala usab siya magdahum nga mapusilan-patay ang nasangpit.
Pag-angkon niya nga barumbado gyud ang iyahang anak ug dawat na niya ang kamatayon niini, apan wala niya gilauman nga kini mamatay gumikan sa pagpamusil.