South Cotabato – Sikop ang duha ka mga lalaki atol sa gipahigayong search warrant operation sa operatiba sa South Cotabato PNP sa pakig-alayon sa PDEA 12 sa Purok Del Pilar, Barangay Kibid, Norala, South Cotabato alas 4:35 ang takna kaganinang kabuntagon, Biyernes, Mayo 12, 2023.
Giila ni Police Brigadier General Jimili Macaraeg, Regional Director sa Police Regional Office 12, ang mga naarestong suspek nga silang alyas “Arnel”, 41-anyos, ug alyas “Jolivy”, 35-anyos susamang mag-uuma ug residente sa maong lugar.
Subay sa report sa Norala Municipal Police Station, gihimo ang operasyon sa CIDG South Cotabato Provincial Field Unit, Regional Intelligence Division 12, South Cotabato Provincial Intelligence Unit, 1205th Maneuver Company, Regional Mobile Force Battalion 12, South Cotabato Provincial Mobile Force Company ug PDEA South Cotabato Provincial Office, nga miresulta sa pagkasikop sa duha ka mga suspek.
Narecover gikan sa balay sa suspek ang kapin kon kulang 25 ka gramo sa gituohang shabu nga nagkantidad ug Php175,000, usa ka unit sa 12 Gauge Shotgun, usa ka Cal.38 revolver, mga buhing bala ug drug paraphernalia ug uban pang non-drug item.
Sa karon anaa na sa kustodiya sa awtoridad ang duha ka mga suspek ug nakatakdang kasuhan ug kalapasan sa RA 9165 o Comprehensive Dangerous Drugs Act of 2002 ug RA 10591 o Comprehensive Law on Firearms and Ammunitions Act.
(Source: PCAG 12 Facebook page)