General Santos City – Isip pagsunod sa Republic Act 10929 (Free Internet Access in Public Places Act), ang Department of Information and Communications Technology (DICT) XII nakatukod na ug total nga 756 ka access point ug 403 ka Wi-Fi locations sa SOCCSKSARGEN Region ug mainland provinces sa Bangsamoro Autonomous Region in Muslim Mindanao (BARMM).
Kana ang gikabutyag ni Department of Information and Communications Technology (DICT) Region 12 Director Engr. Ibrahim B. Guiapar Jr. atol sa Kapihan sa PIA-South Cotabato bag-ohay pa lamang.
Asoy sa maong opisyal, nga ang gidaghanon sa mga lokasyon sa Wi-Fi kada probinsiya nga gitukod sa DICT XII mao ang mosunod: 28 sa Cotabato Province, 79 sa Sultan Kudarat, 29 sa South Cotabato, 26 sa Sarangani ug General Santos City ingon man 124 sa Lanao del Sur, 96 sa Maguindanao del Norte ug 21 sa Maguindanao del Sur.
Samtang, ang ihap sa access points matag probinsiya mao ang mosunod: 57 sa Cotabato Province, 160 sa Sultan Kudarat, 53 sa South Cotabato, ug 54 sa Sarangani-General Santos City area.
Sumala sa DICT XII, ang Free Wi-Fi For All access points nahimutang sa mga pampublikong lugar sama sa mga parke, plaza, barangay centers, merkado, pantalan, airport, transport terminals, eskwelahan, ingon man sa mga komunidad sa mga lumad ug geographically isolated and disadvantaged areas.