Davao Oriental – Bisan pa man sa kahilit ug kalayo sa lugar, gituyoan ug adto ni Governor Nelson Dayanghirang ang Sitio Sigang, Barangay Maragatas, Lupon, Davao Oriental.
Tumong niini nga pormal nga dawaton ang kapin sa usa ka gatos (100) nga mga kanhing mass supporters sa Communist-Terrorist New People’s Army (NPA).
Ang kapin 100 ka mga mass supporters nga gikan sa upat ka sitio nga sakop sa Barangay Maragatas nga mao ang Sitio Manaybanay, Piyagdugan, Catumbal, ug Sigang, nagpadayag sa ilang intensyon nga ila nang ihatag ang ilang hingpit nga suporta ngadto gobyerno ug dili na hatagan ug higayon ang walhong grupo nga mu-sulod pa sa ilang lugar.
Dakong pasalamat ni Governor Dayanghirang sa komunidad sa ilang tininuod ug kinasing-kasing nga pag-balik sa gobyerno ug pagsalikway sa walhong grupo sanglit tinguha sa probinsya ug sa nasud ang pagkab-ot sa tinuoray nga kalinaw ug kalambuan.
Samtang gisugdan na ang ubang proyektong pangkalambuan sama sa kalsada sa maong lugar, gitakdang musunod na ang pag implementar sa mga nagkadaiyang programa sama sa livelihood, patubig, libreng edukasyon, ug imprastraktura, ug uban pang proyekto ubos sa Executive Order 70 sa nasud o Whole-of-Nation Approach to End Local Communist Armed Conflict.
(Provincial Information Office – Davao Oriental | OIC Michael Manguhig, RPN DXKT Davao)
