Cagayan de Oro City – Gikatakdang mahidangat sa syudad sa Cagayan de Oro sa sunod semana si Vaccine Czar Carlito Galvez Jr. aron sa pagsusi sa Vaccination campaign sa City Hall diin makahimo kini sa pagpamakuna sa moabot upat ka libo (4,000) ka mga indibidwal matag adlaw sukad sa miaging semana, matud pa sa gibutyag ni Mayor Oscar Moreno.
Dugtong sa paghidangat ni Galvez sa CdeO, gimanduan na ni Mayor Moreno si Acting City Health Officer Dr. William Bernardo ug Dr. Ted Yu sa Data Management Task Group sa City Health Office sa pag-andam sa report sa vaccination program sa syudad ingon man pila na ka mga tawo sa A1 ngadto sa A4 categories ang nabakunahan na. Gidugang pa ni Moreno sa pagsugilon nga iya usab itaho ni Galvez ang kahimtang sa supply sa bakuna sa syudad ug kon pila ang gikinahanglan niini sa umaabot nga mga bulan.
Sa inadlaw nila nga update, ang vaccination center sa City Hall nagtaho nga adunay 25,602 gikan sa 85,408 ka mga residente sa Cagayan de Oro ang naka-kompleto na sa ilang duha ka dose sa bakuna. Base sa update sa City Health Office nga sa vaccination site sa Ayala Centrio nga gidumala sa DOH-10 ug Northern Mindanao Medical Center o NMMC, nakabakuna na kini sa 1,407 ka mga tawo samtang sa City Hall vaccination sites sa SM Cagayan de Oro Uptown, SM Downtown Premiere ug Limketkai Mall, nakabakuna na kini sa total nga 2,978 ka indibidwal. Matud ni Moreno tinguha sa syudad nga makabakuna sa 5,000 ka mga tawo matag adlaw.
(Gin B. Serohijos, RPN DXKO CdO OIC | City Hall Press Briefing)