Hugot nga gipatuman karon ang gabayan sa Inter-Agency Task Force sa Zamboanga del Norte alang na sa COVID-19 ang pagpasulod sa Authorized Persons Outside Residence (APORs) aron malikayan ang pagkuyanap sa COVID-19 virus.
Kini tipik sa Executive Order Number 20-82 Series of 2020 nga giluwatan ni Governor Roberto Uy pinetsahan Setyembre 30 niining tuiga alang na sa paglugway sa Community Quarantine sa tibuok probinsya sa Zamboanga del Norte hangtud Oktubre 15 ilawum sa Modified General Community Quarantine uban sa gabayan sa pagpatuman niini.
Sa maong Order Ehekutibo ni Governor Uy, ang APORs giklasipikar sa  duha ka kategoriya, diin mao ang APORs within (APORW) ug APORs outside (APORO).
Ang APORW mao ang resident APORs o taga Zamboanga del Norte kinsa ang iyang trabaho dinhi lamang sa probinsya.
Samtang ang APORO mao ang resident APORs kinsa nagtrabaho gawas sa probinsya, ug non-resident APORs kinsa nagtarabaho sulod sa probinsya.
Ang pagsulod sa APORs limitado lamang sa work-related official business ug byahe.
Samtang ang tumong sa pagbyahe sa APORs mao ang pagpahulay, maklasipikar kini nga indispensable travels o kinahanglan  nga pagbyahe ug gi-obligar kini nga mosunod sa rekisitos nga gikinahanglan ug mopailawum sa katorse ka adlaw nga striktong home quarantine.
Dili usab tugutan ang paglingaw-lingaw ug maglaag-laag lamang nga pagbiyahe.
Sa kasamtangan, gipasirado pa ang resorts dinhi sa probinsya.
Ang APORW kinsa magbyahe lamang sulod sa probinsya ang magpakita lamang sa ilang agency ug company ID o dili ba kaha certificate of employment.
Samtang ang indibidwal nga nagpangidaron 21 paubos ug 60 anyos pataas ug adunay immunodeficiency, comorbidity ug uban pang health risk ug buntis ang kinahanglan magpabilin sa ilang panimalay gawas lamang sa mga importanteng kalihukan.
Padayon gihapon ang curfew sa tibuok probinsya, diin ang mga menor de edad mamahimong mogawas sa balay alas 6:00 ang takna sa buntag hangtud na alas 6:00 ang takna sa gabii.
Samtang ang  mga hamtong, mogawas sa alas 4:00 ang takna sa buntag hangtud alas 10:00 ang takna sa gabii.
Samtang mamahimo nang mamalit na sa ilimnong makahubog apan dili kini imnon sa pampublikong lugar.
Nasayran nga ang probinsya mitala ug 60 ka kaso sa COVID-19 kutob kaniadtong Oktubre 1 diin 3 niini ang nakabsan sa kinabuhi.
Niini, giawhag sa Task Force COVID-19 ang publiko nga kanunay magsuot sa face mask ug face shield, mo-oberbar sa physical distancing ug batasanon ang paghugas sa kamot gamit ang sabon ug tubig o dili ba kaha mogamit ug alcohol o hand sanitizer. . (Provincial Information Center-mbmontederamos)