Cagayan de Oro – Nagmalampuson ang First 1000 Days Forum and Milk Letting Activity nga gipahigayon sa City Nutrition Committee (CNC) bag-ohay lamang diha sa DCent Center, IFI, barangay Bulua ning siyudad.
Sumala ni Lorife Naldo, molupyo sa barangay Bulua ug usa sa mga midonar sa iyang breast milk, siya mapasalamaton nga nakatabang sa iyang isig ka inahan. “Nagpasalamat ko og dako sa atong Mayor ug sa nagdumala ani nga makatabang ta sa inahan nga dili paka-produce sa gatas sa ilang mga anak,” saysay ni mommy Lorife.
Nasayran sa pagpanganak ni Mommy Lorife, iyang nasaksihan ang panginahanglanon sa mga inahan sa mga bata nga anaa sa Neonatal intensive care unit (NICU) sa Northern Mindanao Medical Center (NMMC), busa nadani siya pagdonar og gatas.
Mikabat sa 1,440 mL ang nakolekta nga gatas sa mga inahan atol sa milk letting activity.
Ang First 1000 days Forum and Milk Letting Activity gipasiugdahan sa CNC uban sa City Health Office, ug gisuportahan sa NMMC Human and Milk Bank Lactation Unit, lakip mga interns gikan sa Central Mindanao University ug Lourdes College nga nagkuha sa kursong Bachelor of Science in Nutrition and Dietetics, Barangay Nutrition Scholars sa barangay Bulua, IYCF Task Force ug Cagayan de Oro City Police Office.
Written by Cheleste Simene
Photo by Behua Marfori