Agsagsagana ti Gobierno Probinsial babaen iti Environment and Natural Resources Office wenno ENRO kadagiti mamulaan ti “Green Wall Program” nga inrubuat ni Senator Imee Marcos bayat ti panaggobernador na iti Ilocos Norte ken intultuloy ni Gob. Matthew Marcos Manotoc.
Segun ken ni Mrs. Estrella Baby Sacro, mangidadaulo ti ENRO addan dagiti nakaplano a lugar a mamulaan iti masungad nga panagtutudo.
Inlawlawagna a karaman kadagiti maisagsagana a maimula dagiti “Fruit Bearing Trees” ken “Forest Trees”
Malaksid iti daytoy, imbatadna a daytoy ket naiget a suporta iti maysa kadagiti kangrunaan a programa ti gobernador a narimat nga aglawlaw.
Nagapela ni Sacro kadagiti umili a makitinnulong iti Gobierno Probinsial babaen iti panagkiddawda iti imulada a napatubo a kayo.
Innayonna a mabalin dagiti maseknan ti agsurat iti gobernador para iti pannakaipaay ti ania man a kalikagumda a maimula a napatubo a kayo.