Mokabat sa 13 ka mga Emergency vehicles ang gikatakdang i-apod-apod ngadto sa 13 usab ka mga barangay ning dakbayan sa Dipolog.
Kini ang nasayran human mipadangat og sulat-hangyo si Mayor Darel Dexter T. Uy ngadto sa Sangguniang Panlungsod alang sa pagpasar og resolusyon nga maghatag sa gahum ug otoridad ngadto kaniya nga modonar sa 13 ka mga Emergency vehicles ngadto sa mga barangay sa Barra, Central, Cogon, Dicayas, Diwan, Estaka, Gulayon, Lugdungan, Minaog, Miputak, Sangkol, Sta. Filomena ug Turno, tanan ning dakbayan.
Ang nahisgutan nga mga sakyanan ang paga-gamiton kon dunay mga medical emergencies, kalamidad ug uban pang sitwasyon nga nagkinahanglan og hinanaling pagresponde.
Si konsehal James Cyril L. Ruiz III, Chairman sa Committee on Health and Sanitation, ang mipadas-og sa mosyon aron mapasar ang resolusyon alang ning maong katuyoan diin kini gidasonan ug gi-aprobahan usab sa mga sakop sa konseho atol sa regular session niini kagahapong adlawa, Disyembre 20 ning tuiga ubos pagpangulo ni President Pro-Tempore ug Presiding Officer Atty. James P. Verduguez.
(Source: Dipolog City Government Facebook page)