Cebu City – Mikabat sa 40 ka bay ang naugdaw ug 295 ka tawo ang nagkatibuwaag sa sunog nga miulbo sa Upper Tabok, Brgy. Tabok, dakbayan sa Mandaue gahapon sa buntag.
Suma pa ni Kapitan Dario Tariman, ang 295 ka nasunogan o 98 ka pamilya, temporaryong gipapasilong sa Brgy. Gymnasium.
Subay niini, matod ni Tariman, buot nila nga ideklarar ubos sa state of calamity ang Upper Tabok.
Nanawagan usab siya sa mga malumo og kasingkasing sa pagtabang sa mga biktima.
Midugang si Tariman nga mahimo kining mohatag og pagkaon ug ginamit nga mga sinina ug ihatod lang sa Tabok Barangay Hall.
Hinuon, ang Social Welfare and Services Office ug ang barangay miapod-apod na og pack meals sa mga biktima.
Ang mga imbestigador sa kabomberohan sa Mandaue mibutang sa danyos sa sunog ngadto sa ₱ 280,000.
Suma pa sa kabomberohan, ilang nadawat ang alarma nianang alas 8:53 sabuntag ug giisa sa third alarm pagka alas 9:06; nakontrolar pagka alas 9:50 ug napawong alas 10:40 na sa buntag.
Wa pa matino ang hinungdan sa sunog apan gisusi sa kabomberohan ang report nga ang transformer sa usa ka utility company ang mibuto nga gisundan sa dilaab sa kayo. (Jhon Tadlip/JTY)
(Source: Mandaue City Fire Office, photos courtesy by Maria Cristina Siose | Sniperdon Cabanilla)