Cebu City – Nagpositibo sa Covid-19 ang 13 ka mga police personnel ug 14 ka mga detainees sa Samboan Police Station.
Matod ni Cebu Provincial Police Office Chief Engelbert Soriano nga sa 14 ka mga inmates, usa nila ang gidali pagdala sa hospital ug kasamtangan nga gimonitor.
Dunay walo ka mga personnel sa Provincial Mobile Force Company ang gi deploy sa Samboan pagdugang sa ilang police force.
Gipa-ubos ang lungsod karon sa “hard lockdown” sa unom ka adlaw gumikan sa pagsaka sa mga kaso sa Covid-19.
Nasinate sa unang adlaw sa “hard lockdown”, Biyernes, Hulyo 23, ang kamingaw sa mga karsada sa lungsod sa Samboan.
Maisip nga timailhan sa pagsunod sa mga molopyo sa mando sa LGU pinaagi ni Mayor Emirito Calderon.
Ang maong lungsod nga nahimutang sa habagatang bahin sa Lalawigan sa Sugbo, dunay pito ka mga barangay nga gipa-ubos sa maong lockdown. (Jhon Tadlip)
(News & photo courtesy of Municipality of Samboan Facebook page | Cebu Provincial Police Office)
