Cebu City – Gipapha ni Lapu-Lapu City Mayor Junard “Ahong” Chan ang duha ka traffic enforcer nga nakuhaan og video sa dashcam nga midakop sa usa ka drayber sa sakyanan nga ilang gikalitan pag-overtake niadtong gabii sa sayong bahin ning buwana.
Nasuta sa imbestigasyon nga sad-an ang duha ka sakop sa CTMS o City Traffic Management System kay kini ang kalit misal-ot sa lane sa sakyanan kansang drayber ilang gidakop sa kasong “reckless driving” ug giisyohan og citation ticket.
Gimando dayon ni Chan ang imbestigasyon sa City Legal Office pagkakita sa post sa Facebook sa usa ka Menelux Guillermo sa video gikan sa dashcam sa iyang gisakyan.
Wa hinuon makahinumdom sa petsa sa pagkahitabo si Guillermo apan matod niya, dihang adunay nangutana sa iyang post, nga hayan nahitabo kini pagka Disyembre 9 sa gabii sa karsada sa Brgy. Pusok.
Ang post ni Guillermo gi-forward sa usa ka netizen ngadto sa Facebook sa Cebu Road Heroes hinungdang miabot sa pagtagad ni Chan ug gipaimbestigar.
Dayag sa footage nga diretso ang dagan sa sakyanan nila ni Guillermo dihang sa kalit lang mitunga sa ilang atubangan ang motorsiklo nga gisakyan sa duha ka enforcer.
Apan paglabay sa pipila ka gutlo, gisenyasan sila pagpara aron dakpon sa way klarong kalapasan, butang nga wala mauyoni ni Mayor Chan.
(Jhon Tadlip/JTY, photo courtesy of screenshot from Menelux Guillermo video)
(Source: Lapu-Lapu City Public Information Office)
