General Santos City – Patay ang usa ka Driver nga nailhang si Allan Gallas, 45, driver , residente sa Zone 8, Purok Vicente, Labangal human kining gipusil sa wala pa mailhing suspek kagabie, August 12, 2021, didto mismo sa ilang panimalay.
Sa pakighinabi sa RPN Gensan ngadto sa asawa sa biktima nga si Luz, ayha nahitabo ang pagpamusil, may lalaki matud pa nga magpaload unta sa ilang tindahan, apan iyang gibalibaran gumikan wala silay baligya nga load.
Natingala ang ginang human nga mituyok matud pa ang mga lalaki sa likod nga bahin sa ilang panimalay, gumikan niini iyang gipukaw ang iyang bana ug gisultihan nga adunay tawo sa ilang likod nga bahin.
Gisuta gilayon sa iyang bana ang gikaingong mga tawo apan pipila lang ka gutlo ang nakalabay, nakadungog na matud pa ang ginang ug masipang boto sa pusil ug dihang iyang gisuta, nagbuy-od na ang iyang bana kansa duna nay samad pinusilan.
Paspas matud pang misibat ang suspek diin usa niini nakasul-ob ug puti nga T-shirt samtang ang usa nakajacket matud pa ug kolor itom.
Nasayran nga nakabsan gyud sa iyang kinabuhi ang biktima human nga nakaangkon ug samad sa iyang dughan ug tangkugo nga bahin.
Sulti pa sa Ginang sa RPN Gensan News Team nga wala man sya’y nasayran nga nakalaban ang iyang bana ug wala usab kini nasulti kaniya nga adunay syay bahad sa kinabuhi.
Sa karon blangko pa gyud ang ginang unsay hinungdan sa pagpusil sa iyang bana, dungan niini nagsinggit ug hustisya ang nasangpit human sa nahitabo sa iyang bana.
(John Rey Somido)