Sta. Cruz, Davao Del Sur – Dakpan ang usa ka company driver sa RTQ Construction human nga na-aktuhan nga nangawat sa iyang gi-trabahoan alas 11:50 sa sayong kaudtuhon niadtong adlaw nga Huwebes, Setyembre 9.
Giila sa kapolisan ang suspek nga si Kevin Suganob, 20 anyos, dunay ka live-in ug nagpuyo sa San Roque, Riverside, Calinan ning siyudad sa dabaw.
Gibutyag ni Police Major Crisaldo Gaila, hepe sa Sta Cruz Police Station nga naharang si Suganob kinsa nagmaniho sa Kia Bongo alang sa inspection sa naka-duty nga security guard diin nasuta nga gikargahan kini ug tulo ka sako nga pinutol nga mga Bronze nga mitimbang sa dili mo-minus 80 kilos.
Ang RTQ Construction maoy kontraktor sa Oro Cemento Company diin gikawat sa suspek ang mga Bronze. Nasayran usab nga kaniadto pa namatikdan nga dunay nahitabong pagpangawat sa kompanya apan karon lamang nasakpan ang panghitabo.
Balhog na sa prisohan ang dinakpan samtang giandam na ang kaso’ng ipasaka batok kaniya.
(Source: Sta. Cruz Municipal Station)
