Gipadayon sa Provincial Government of Zamboanga del Norte ang pagkongkreto sa 1,000-metros nga Farm-to-Market Road sa Motibot–Sitio Tisan Road section sa Barangay Motibot, Sindangan, nga gitumong sa pagpaayo sa pagbiyahe sa mga residente ug mag-uuma.
Adunay giaprubahang pondo nga ₱6.225 milyon ang proyekto, nga adunay 7 metros nga road width, 5 metros nga pavement width ug 0.178 metros nga gibag-on. Gilauman usab nga mas mapadali niini ang pagdala sa mga produktong agrikultural gikan sa mga umahan ngadto sa mga merkado.
Sumala ni OIC Provincial Engineer Lane John Lim, gisugdan ang land preparation sa proyekto niadtong Marso 15, 2021 apan wala kini mahuman ug napahunong sulod sa pipila ka tuig. Ubos sa administrasyon ni Governor Darel Dexter T. Uy, gipadayon ang proyekto pinaagi sa administration mode, diin direktang gidumala sa Office of the Provincial Engineer ang implementasyon.
Sa pagkakaron, nagpadayon ang pagbuhos sa konkreto ug uban pang buluhaton sa mga personahe sa OPE aron masiguro ang hustong pagpatuman sa proyekto. Sa hingpit nga pagkompleto niini, gilauman nga makahatag kini og mas sayon nga agianan alang sa mga residente ug mag-uuma ug makatampo sa kalihukan sa lokal nga agrikultura ug komersiyo.(JENIFFER JR. DELICA)
Source: Zamboanga del Norte Provincial News Network