Sa tunga sa bug-at nga pakigbisog batok sa cancer, usa ka pamilya sa Siayan nakadawat og dugang kusog ug paglaum human mahatagan og ₱50,000 nga medical assistance gikan sa Probinsyal nga Pangagamhanan.
Ang maong kantidad gitunol alang sa pagtambal ni Gilbert “Gibo” Bongcawel, 46 anyos, nga nagkinahanglan og padayon nga medikal nga atensyon. Iyang igsoon nga si Shella B. Bulan maoy midawat sa ayuda sa ilang ngalan.
Gipangunahan ang paghatag sa tabang nila Acting Provincial Administrator Charmie Asprer-Yu ug Acting PSWDO Officer Hannah Lou G. Mandantes, ubos sa programa sa administrasyon ni Governor Darel Dexter T. Uy nga nagtutok sa pagtabang sa mga pasyente nga walay igong kapasidad pinansyal.
Alang sa pamilya Bongcawel, ang maong tabang dili lamang kwarta kondili usa ka dakong kahupayan samtang ilang giatubang ang mahalon nga gasto sa tambal ug operasyon.
Samtang, nagpadayon ang probinsyal nga pangagamhanan sa pagpalig-on sa social services aron mas daghang residente ang matabangan, ilabina kadtong nagkinahanglan og dali ug konkretong suporta sa panglawas.(IKEN B. GULLEM)
Source: Zamboanga del Norte Provincial News Network