253 ka benepisyaryo sa siyam ka Sustainable Livelihood Program (SLP) Associations sa Salug ang makadawat og bag-ong oportunidad sa panginabuhian human sa ceremonial turnover sa ₱4.9 milyon nga Seed Capital Fund gikan sa Department of Social Welfare and Development (DSWD).
Mitambong sa turnover si Cong. Ian Amatong, uban sa mga opisyal sa DSWD ug Municipal Government of Salug, diin gitunol ang pondo alang sa pagpalambo sa nagkalain-laing community enterprises sa mga beneficiary associations.
Gilauman nga ang maong pondo mahimong puhunan sa mga livelihood projects sama sa candle making, catering services, egg production, water refilling station, salt farming, sewing, paghimo og Muslim delicacies ug frozen products, ug dried fish production.
Dili lamang temporaryong tabang ang tumong sa maong programa, kondili ang paghatag og puhunan nga mahimong sinugdanan sa malungtarong negosyo ug kita alang sa mga benepisyaryo ug ilang mga pamilya.
Sa iyang mensahe, gipasiugda ni Cong. Ian ang papel sa livelihood programs sa paghatag sa mga pamilya og oportunidad nga makakwarta, mahimong mas independente sa panginabuhi, ug makatukod og mas lig-on nga kaugmaon.
Gilauman usab nga pinaagi sa husto nga pagdumala sa seed capital, ang mga livelihood projects mahimong molambo ug makahatag og dugang trabaho ug oportunidad sa sulod sa ilang mga komunidad.
Lakip sa mitambong sa kalihokan sila si DSWD Regional Director Riduan Hadjimuddin, CESO III; Salug Mayor Dra. Ruth Brillantes; Board Member JR Brillantes; Teresita Pamil, Sea Breeze SLPA President; Melanie Ladjamalik, OIC-Regional Program Coordinator; ug Mary Ann Mag-abo, SWADT Team Leader.
Ang paghatag sa ₱4.9 milyon nga seed capital nagtimaan sa paningkamot sa DSWD, lokal nga kagamhanan, ug mga partner stakeholders nga mapalapad ang mga oportunidad sa panginabuhian ug mapalig-on ang kapasidad sa mga komunidad nga makabarog sa kaugalingon.(IKEN B. GULLEM)
Source: Team Adrian Amatong