Natapos ug opisyal nang giturn-over ngadto sa mga benepisyaryo ang Biwa Bridge ug Titik Bridge sa Sindangan, Zamboanga del Norte, nga nagrepresentar sa dakong pamuhunan alang sa pagpalambo sa imprastraktura ug konektibidad sa mga komunidad.
Nahuman ang Biwa bridge pinaagi sa pondo nga ₱64,320,559.82, samtang ang Titik Bridge adunay project cost nga ₱208,248,500.00. Sa kinatibuk-an, mokabat sa ₱272,569,059.82 ang kantidad sa duha ka proyekto.
Ang duha ka tulay gitukod aron mapalambo ang pagbiyahe ug koneksyon sa mga komunidad, ilabina sa mga residente sa Barangay Titik ug mga kasikbit nga lugar. Ang mas lig-on ug mas kasaligan nga imprastraktura naghatag og mas maayong access alang sa mga residente, negosyo, ug uban pang kalihokan sa komunidad.
Gisugdan ang mga proyekto atol sa termino ni kanhi Congresswoman ug karon Municipal Mayor Hon. Glona G. Labadlabad, pinaagi sa inisyatiba ni kanhi Mayor Rosendo S. Labadlabad alang sa pag-secure ug paglaan sa gikinahanglang pondo.
Sa pagpadayon sa proyekto, malampusong gipangunahan ni Congresswoman Irene “Ate Ai” Labadlabad ang turnover sa nahuman nga Biwa ug Titik Bridges ngadto sa katawhan.
Ang pagkompleto sa duha ka proyekto nagpakita sa konkretong resulta sa padayong pagplano ug pagpamuhunan sa imprastraktura—mga pasilidad nga gitumong dili lamang alang sa karon, kundili alang usab sa mas sayon, luwas, ug mas konektadong komunidad sa umaabot.(IKEN B. GULLEM)
Source: Municipality of Sindangan