Mikabat sa 150 ka Giant Bamboo seedlings ang gitanom sa personnel sa Zamboanga Nickel Corporation (ZNC), mga contractor ug DENR-CENRO Liloy isip kabahin sa selebrasyon sa World Bamboo Day 2026 nga gipahigayon niadtong Septiyembre 27,2026 isip pagpalig-on sa pagpanalipod sa kalikupan.
Ang kalihokan gipangulohan sa ZNC pinaagi sa Mine Environmental Protection and Enhancement Office (MEPEO), nga gitambongan sa 81 ka participants nga gipahigayon sulod sa MPSA Area sa kompanya.
Gipunting ang pagtanom sa kawayan sa daplin sa mga sapa aron makatabang sa pagpalig-on sa yuta,pagpakunhod sa erosion, pagpanalipod sa mga agianan sa tubig ug pagpreserbar sa biodiversity sa maong lugar.
Gihatagan usab og gibug-aton sa kalihokan ang kahinungdanon sa kawayan isip usa ka tanom nga lig-on apan dali usab mopahiangay sa kausaban.
Tungod sa lig-on nga gamot niini, ang bamboo giila usab nga makatampo sa pagpalig-on sa ekosistema ug rehabilitasyon sa mga lugar nga nanginahanglan og dugang nga vegetative cover.
Pinaagi sa maong kalihokan, gipakita sa mga partisipante nga ang pag atiman sa kinaiyahan usa ka hiniusang responsibilidad.
Ang matag tanom nga kawayan gitumong nga mahimong dugang nga tabang sa pagpanalipod sa mga sapa, pagpalig-on sa ekosistema ug pagtukod og mas malungtarong kaugmaon.(MEDALYN U. BORJA)
Source: Zamboange Nickel Corporation