Mapainit nga gibutyag ni Mayor Jose Michael Meiko Wong ang padayong kalamboan ug serbisyo nga duol sa katawhan atol sa State of the Municipal Address o SOMA 2025 nga gipahigayon sa Katipunan Gymnasium niadtong Oktubre 24, 2025.
Gipasalamatan sa alkalde ang katawhan sa iyang ikaduhang termino isip mayor ug gibutyag usab ang personal nga kasakit sa pagkawala sa iyang inahan ug igsoon nga si Konsehal Willie James Wong. Gipahimugatan sa mayor ang iyang Executive Order nga nagtugon sa mga ahensya sa kagamhanan nga moadto mismo sa mga kabarangayan aron madali ang pagserbisyo sa katawhan.
Gipakita sa SOMA ang daghang kalampusan sa Katipunan, lakip na ang pagkamakabago sa pinansyal nga pagdumala, kalimpyo ug basura, kahimsog, kalinaw ug seguridad, agrikultura, ug imprastruktura. Gipadayag usab ni Mayor Wong ang mga proyekto para sa 2026 sama sa pagtukod sa Katipunan Sports Complex, sanitary landfill, ug renewable energy program sa kabarangayan.
Sa pagtapos, gipasidunggan sa gobernador, bise gobernador, ug mga opisyal sa probinsya ang administrasyon ni Mayor Wong tungod sa iyang tinud-anay nga pagserbisyo ug liderato alang sa kalamboan sa Katipunan.(Jeniffer Jr. Delica)
Source/Photo Courtesy: Zamboanga del Norte Provincial News Network