Walay kamatuoran, ug gipanghimakak sa Kapulisan sa Dakbayan sa Dipolog ang nagkatag nga balita mahitungod sa pagtulis sa usa ka ahente sa panel nga nahitabo didto sa Lobing Ogis, Galas, Dipolog City kaniadtong Enero 16, 2026.
Sumala sa opisyal nga pahayag sa Dipolog City Police Station, human sa lawom ug hugot nga imbestigasyon, wala’y bisan unsang ebidensya nga nagpakita nga tinuod ang maong insidente. Klaro sa kapulisan nga ang nagkatag nga impormasyon walay lig-on nga basihan ug giklasipikar kini isip false news nga posibleng nakahatag ug kahadlok ug kalibog sa katawhan.
Gipahimangnoan sa kapulisan ang publiko nga magmatngon sa pagtuo ug pagpaambit sa mga dili beripikado nga balita, ilabi na kadtong makapahinungdan ug kahadlok sa komunidad.
Ang maong pahayag gipagawas aron mapahunong ang pagkatag sa sayop nga impormasyon ug mapadayon ang kalinaw ug kahusay sa dakbayan.
Bisan pa niini, nagpabilin nga alerto ang kapulisan ug nagpadayon sa ilang regular nga patrol ug police visibility aron masiguro ang kaluwasan sa tanang residente sa Dipolog City.(IKEN B. GULLEM)
Source: Dipolog City Police Station, ZNPPO