Gipangunahan ni Governor Rosalina “Nanay Nene” Jalosjos ang kick-off ceremony sa upat ka mga dagkong selebrasyon sa Department of Health karong bulan sa Agosto 2023, dinhi sa Zamboanga del Norte, atol sa gipahigayong Flag Raising Ceremony.
Kini mao ang Family Planning Month, National Lung Month, Breast-feeding Month ug National Hospital Week.
Sumala pa sa gobernador, kining maong mga kalihokan sa DOH maoy mahinungdanong kahigayonan para madugangan ang kahibalo sa tanan kabahin sa mga mahinungdanong programa sa panglawas ug gimbuhaton sa Departamento sa Maayong Panglawas sa katilingban may kalabutan niini.
Matod pa ni Governor Jalosjos, ang Family Planning Month nagpahinumdom kanato sa kamahinungdanon sa tukmang desisyon pagplano sa pamilya, paghatag ug gahum sa matag indibidwal ug pamilya aron paghimo ug desisyon nga makahatag ug positibong kausaban sa ilang kinabuhi.
Dugang pa sa gobernador nga kinahanglang ilhon nato ang relasyon tali sa nutrisyon, agrikultura, ug malungtarong kalambuan.
“Sa atong bahin, ang Kagamhanang-Probinsyal sa Zamboanga del Norte, mokomitir ug waykinutubang suporta sa mga advocates sa nutrisyon ug mogahin ug alokasyon ug mamugna mahimsog nga katawhan sa Zamboanga del Norte”, pahayag pa sa gobernador.
Samtang si Family Planning/Adolescent Program Coordinator Ms. Elena R. Daarol nagkanayon nga ang paglusad sa bulan sa Agosto sa Family Planning Month nagdala sa tema, “Usap tayo sa Family Planning para protektado ang Pamilyang Pilipino”.
Gihisgutan ni Ms. Daarol ang mga benefits ug mga safety guiding principles alang sa family planning.
Nahisgutan usab ni Ms. Daarol nga aduna silay free commodities sama sa pills, ug condom nga anaa sa ilang buhatan ug dugang pa niiya, ug alang sa dugang mga impormasyon, mamahimo mong muadto sa mga health facilities sa inyong lugar.
Si NTP Program Coordinator Marilette Jalosjos sa Provincial Health Office, kini nagkanayon nga adunay libreng mobile x-ray sa kalungsuran ning probinsya para sa bulan sa Agosto.
(Source: Provincial Information Center ZaNorte Facebook page)