Tagak sa kamot sa tinogyanan sa balaod ang tigpayuhot sa ginadiling drogang shabu sa gipahigayon nga drug buy bust operation didto sa Barangay Silawe sakop sa lungsod sa Polanco, Zamboanga del Norte, kagabii.
Ang gisikop giila sa Polanco PNP nga si Diosdado Dajonan Lagudas Jr., 26 anyos, ulitawo, lomolopyo ra sa nahisgotang lugar.
Sigun sa nahipos nga report gikan sa Polanco Municipal Police Station, nasayran nga ang Polanco PNP sa pagpangulo ni P/Maj. Nestor Gania Jr., Chief of Police, mingkasa sa usa ka drug buy bust operation didto sa Purok Buongon Barangay Silawe sa lungsod sa Polanco nianang alas 9:00 kapin kon kulang ang takna kagabii nga mingresulta sa pagkasikop sa nahisgotan.
Nakuha gikan sa posisyon ug control sa suspek ang 6 ka putos sa drogang shabu nga adunay street value nga mobalor ug ₱ 20,000.00 ug lakip na ang marked money nga P500.00.
Ang dinakpan anaa na karon nagtingkagol sa sulod sa selda sa Polanco MPS samtang gihikay pa ang kaso nga ipasaka batok kaniya.
(Source: PNP Polanco)