Gipalig-on sa Department of Labor and Employment ang pagpatuman sa Tulong Panghanapbuhay sa Ating Disadvantaged/Displaced Workers o TUPAD Program sa Leon B. Postigo pinaagi sa paghatag dili lamang og temporaryong trabaho kondili usab og bag-ong kahanas ug oportunidad sa mga benepisyaryo.
Niadtong Hulyo 24, gipahigayon sa Department of Labor and Employment ang payout alang sa mga benepisyaryo sa Barangay Midatag ug Barangay Mawal. Ang mga benepisyaryo sa Midatag nakakompleto sa 20 ka adlaw nga trabaho sa pag-ayo sa playground, basketball court, ug multipurpose hall sa barangay, ug mitabang usab sa Brigada Eskwela sa Midatag Elementary School.
Samtang ang mga benepisyaryo sa Barangay Mawal nakatapos sa 45 ka adlaw nga trabaho sa Central Materials Recovery Facility diin naapil sila sa communal gardening, waste segregation, compost production, tree growing, backyard gardening, ug paghimo og eco-charcoal gikan sa gigamit nang papel ug karton.
Aron madugangan pa ang ilang kahanas, nagpahigayon usab ang Technical Education and Skills Development Authority og duha ka adlaw nga pagbansay sa organic agriculture production. Sa maong kalihokan, gipasidunggan usab ang mga benepisyaryo sa ilang malampusong pagkompleto sa programa.
Human sa programa, nagtukod ang mga benepisyaryo sa Mawal Organic Farmers Association aron ipadayon ang ilang pagtinabangay sa organikong pagpanguma ug pag-atiman sa kalikupan. Sumala sa Department of Labor and Employment, nagpakita ang maong inisyatiba nga ang TUPAD mahimong dalan dili lamang sa temporaryong trabaho kondili usab sa pagpalambo sa kahanas, panginabuhian, ug aktibong partisipasyon sa komunidad pinaagi sa panagtambayayong sa Technical Education and Skills Development Authority ug sa Lokal nga Panggamhanan sa Leon B. Postigo.(JENIFFER JR. DELICA)
Source: DOLE Liloy Satellite Office