Doble nga kalampusan ang gidala sa pamilyang Enriquez sa Katipunan, Zamboanga del Norte human makasulod sa Top 9 sa 2026 Physician Licensure Examination (PLE) si Dr. Antonio Edson Bryce Natividad Enriquez samtang nakapasar usab ang iyang igsoon nga si Edson Reinier Joseph Natividad Enriquez, sumala sa resulta sa Professional Regulation Commission (PRC).
Si Dr. Enriquez nahimong ika-9 sa tibuok nasud, usa ka talagsaong nahimo sa usa sa labing kompetitibong eksaminasyon sa medisina sa Pilipinas. Ang iyang igsoon, bisan wala makasulod sa Top 10, malampuson gihapon nga nakapasar, nga nagdugang sa garbo sa ilang pamilya ug komunidad.
Ang duha ka managsoon mga gradwado sa Matias H. Aznar Memorial College of Medicine, Inc., nga nailhan sa paghulma og mga maayong propesyonal sa medisina. Ang eskwelahan mipadayag usab sa ilang pagpasalamat ug pagpasigarbo sa nahimo sa duha ka alumni.
Anak sila ni Edsel G. Enriquez, usa ka negosyante, ug Annabellee N. Enriquez, Assistant District Revenue Officer sa Bureau of Internal Revenue sa Dipolog City. Giila ang lig-on nga suporta sa ilang pamilya isip usa sa mga hinungdan sa ilang kalampusan.
Sumala sa mga nakaila kanila, ang ilang kalampusan bunga sa dugay nga pagpangandam, disiplina, ug paningkamot sa medisina, lakip na ang hagit nga pag-review alang sa board exam.(IKEN B. GULLEM)
Source: Zamboanga del Norte Provincial News Network